Die Jakaranda-lewe

Hello almal

Hoe gaan dit met julle?

Welkom in die maand van Februarie. Manne, Valentynsdag is om die draai. Julle gaan moet begin plan maak. Ek hoop julle kan darem aan iets beter as blomme en tjoklits dink. U anderhelfdes moet hierdie dag vir altyd onthou.

Nie vir die verkeerde redes soos Oscar nie.

Dankie tog Superrugby het weer begin. Ons (ek) is maar taamlik verlore daarsonder. Ek hoop ook die studente-rugby in vanjaar se Varsity Cup is van die boonste gehaltes. Die Sesnasies beter ook te vinde wees vir aanskoulike rugby.

Mag die Proteas ook asseblief hul kolfsokkies optrek. Ons kan nie nog ʼn reeksloesing vat nie. Dit lyk of hul sterk gaan staan, siende dat hulle die eerste eendagwedstryd gewen het.

Liverpool se sokkerspan raak nou lekker rammetjie-uitnek. Wag maar, oor ʼn seisoen of wat is Man U weer op sy beste.

Wat dink julle van prins Harry en sy vrou Megan Markle wat wegbreek uit die koninklikke lewe in Brittanje vir ʼn stiller lewe in Kanada? Dit is hulle reg, maar wie gaan vir hul ‘around-the-clock’ veiligheidskostes betaal? Hulle sal altyd ʼn teiken vir ekstrimiste bly.

Daar vind Brexit wragtig plaas en oom Donald kom lag-lag uit die moeilikheid.

Wat dink julle van al hierdie wit skoenlappers wat hier rond vlieg? Het dit iets met klimaatsverandering te doen?

Wat dink julle van hierdie coronavirius wat almal aan die praat het? Moet ons bekommerd wees? Lyk my as jy ʼn jaar met die getal 20 in het, het jy moeilikheid. In 1920 het die Spaansegriep moes uitgebreek!

Laasmaand was ek bietjie in Pretoria gewees. Ek het saam gegaan om my sus reg te kry vir die studentelewe.

Ons moes haar woonstel uitpak en inrig en alles regkry om haar op haar nuwe avontuur te stuur. Ek het vir ʼn paar nagte op die bank geslaap. Nou weet ek hoe voel getroude mans as hulle in die ‘dogbox’ is en op die bank moet gaan slaap.

Mens kon sien daar bly studente in die omtrek, want wie anders sou hul musiek kliphard speel.

Tuks (Universiteit van Pretoria) het verskeie kampusse. Ek het hulle gaan verken met my nuwerolstoel. Ek was so bietjie skrikkerig gewees, ek is mos ʼn oud-Kovsie wat vir die Shimlas skree.

Pretoria is ʼn stad aan die ontwikkel. Hoe dan so as die land se ekonomie in die toilet is?

Besighede en kantoorblokke pop op soos paddastoele. Die winkelsentrums en eetplekke is tjok-en-blok vol. Die verkeer kan nogal mens se geduld toets.

Gepraat van eetplekke: Ek was een aand by ʼn plek met die naam Mustang Sally’s. Dis ʼn eetplek in Hatfield. As jy instap dan dink jy, jy is in een van daardie Amerikaanse ‘diners’ wat hulle altyd op tv wys.

Die tema is Amerika en die mure is propvol plakkate van o.a Elvis en Marrilyn Monroe.

Die plek maak monstergroot-hamburgers met verkillende name soos James Dean of John F. Kennedy. Daar is ook ander opsies soos ‘corndogs’ of ‘macaroni-puffs’.

Hul melskommels word uniek versier. Die“Candy-floss”-opsie is ʼn melkskommel met ʼn hoop spookasem bo-op. Die skemerkelkies word bedien in glase groter as visbakke waarin jy goudvisse aanhou. Die atmosfeer is gesellig en die agtergrondmusiek pas by die plek. Treffers van The Eagles en Frank Sinatra was onder diegene wat gespeel is.

Die porsies was verskriklik groot, maar ons het nie ʼn plaas se prys daarvoor betaal nie.

Menlyn het ook verander in die 10 jaar sedert ek laas daar was. Die hele kompleks is groter, die gange is wyer en is self na strate in New York vernoem sodat kopers nie verdwaal nie(ek het in elkgeval verdwaal).

Hoe David Livingstone en sy tjommies koers gehou het in die ou dae weet ek nie.

Ek het lekker by Cappuccino’s, ʼn Italiaanse restaurant geeёt. Hul pizzas is baie lekker. Probeer ook vir Parrots. Hulle is al daar van die begin af. Kies gerus die pannekoek met spinasie en feta. Pasop vir die mak pappegaai wat hulle daar aanhou, hy sal jou vinger sommer speel-speel byt.

Om te fliek, kyk gerus die nuwe “Jumanji”-film. Ek is mal oor hierdie filmteaters daar by Menlyn. Dit gebeur min dat ek met my rolstoel tot heelvoor by die skerm kan ry. Die nuwe “Bad Boys”-fliek is ook nie te sleg nie.

Het julle al van WeBuyCars gehoor. Hulle is ʼn maatskappy wat enige kar direk by jou koop en dan weer verkoop aan iemand anders. Hulle het so groot skuur (lyk amper soos ʼn ou Makro) waar al die karre te koop uitgestal word. Ek het self ʼn klompie karavane gesien.

Ek het gaan kyk na karre daar. Was nie eintlik te vinde vir enige een nie. Daar was geen goeie waarborge op die karre nie.

Ek het ook historiese plekke besoek soos die Uniegebou. Daar waar die politieke septer geswaai word. Dit is ʼn baie impossante gebou. Dit was vir my ʼn eer om te aanskou.

By die ingang van die Unie-gebou was daar ʼn tentekamp met verteenwoordigers van die Khoisan wat van plan is om daar te ‘woon’ tot aan hul vereistes voldoen word. Hulle wag glo meer as ʼn jaar vir ʼn antwoord.

ʼn Paar jaar terug is ʼn standbeeld van Nelson Mandela daar by die Unie-gebou opgesit. Op tv lyk dit groter as wat dit is.

Die beeldhouers het toe hulle hom destyds gemaak het ʼn klein haas in sy oor geplaas sodat hul werk geïdentifiseer kon word. Intussen is dit darem afgehaal.

Die hele terein is nie rolstoel-vriendelik nie. Alles is op terasse geleё.Ek kon aanvanklik nie by die standbeeld uitkom nie, daar moes ʼn plan met my gemaak word. Gelukkig het die sekuriteits manne ons gehelp om deur ʼn geslote hek te kom.

Vir die eerste keer in my lewe was ek na die Voortrekker monument toe. Siende dat my voorouers Trekkers was, het ek gevoel ek moet gaan kyk wat gaan aan daar.

Noudat ek daar was voel elke Afrikaner moet darem net een keer in sy lewe soontoe gaan. Dit kan dien as ons Mekka. Daar is ʼn groot deel van ons geskiedenis wat bewaar word en kennis is daar te vind wat aan nuwe generasies blootgestel moet word.

Die monument is pragtig ontwerp en uiteengesit. Alles was rolstoel toeganklik en ek kon tot bo-op die monument gaan wat vir my ʼn asemrowende uitsig van Pretoria gegee het. Ek kon o.a Loftus Versfeld, die Uniegeboue en die Vodacom-toring in die verte sien.

Die monument is buite Pretoria op ʼn wildreservaat met wildspesies soos swartwildebeeste en elande. Hiers ʼn kafee, ʼn boekwinkel en ʼn aandenkingswinkel.

Binne in die monument is

  • ʼn Saal met marmerpotrette wat die historiese gebeure uitbeeld
  • Skilderye van die gebeure
  • Ou voorwerpe uit die Trekkertye
  • Voorbeelde en inligting van die lewenswyse van die Voortekkers
  • ʼn Koepel waardeur die son jaarliks op die 16de Desember om twaalfuur op ʼn klip skyn wat sê: ONS VIR JOU SUID-AFRIKA
  • ʼn Afdeling vir die bou van die monument

Ek hoop om binnekort weer terug te gaan. Daar is nog plekke wat ek wil besoek.

  • Dieretuin (ek soek ʼn Gorilla om my rond te dra)
  • Hard rock Café
  • Oom Paul se standbeeld
  • Kruger-huis
  • Freedom Park
  • Weiveld

Ek hoop om binnekort terug te keer, dalk as die jakarandas blom.

Totsiens julle, ons praat weer!

Published by Tief

Ek blog oor dinge wat vir my interessant is en wat my aandag trek...

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

%d bloggers like this: